Сонэто 071

На дурэды́р дрэ туга ту рипир

Пал ма́ндэ, сыр кудуни ту шунэ́са:

Про свэ́то джюнгало́, гэём катхы́р

Ко джюнгалэ́ кирмэ, — кана́ дживэ́са.

Коли́ дыкхэ́са адалэ́ лава́,

Ман на рипир; — адя́кэ зоралэ́с

Кама́м тут, ачява́в на одова́,

Со тут зачилавэ́ла дукханэ́с.

Коли́ мирэ́ лава́ ту удыкхэ́са,

Мэ кокоро́ ячьёмпэ пхув калы́,

Ту на́ хасёв пал ма́ндэ илорэ́са,

На трэ́би лэ́скэ мри патри́н мулы́.

Кирно́ да свэ́то пал тырэ́ ясва́

Чюрдэ́л пр’ амэ́ндэ о кирнэ́ лава́!

Сонэто 072

Сыр свэ́то зачювэ́л тут тэ пхэнэ́с:

Палсо́ камья́н ман, сыр ман покамья́н? –

Ту забистыр сарэ́са ман миштэ́с,

Сыр ту ничи́ дрэ ма́ндэ на латхья́н.

Жыка́й патывало́ хохаибэ́н

Тырэ́ чибатыр на зурня́ндыя,

Тэ ма́нгэ буты́р, сыр дро джиибэ́н,

Тими́н на́чячюны на придыя́,

Ту на́ хохав лаче илэ́са ман:

Мро лав миштэ́с дро гро́бо гарадо́,

На чилавэ́ла ман свэты́тко зан,

Кэ ту да пхэныбэ́н на прикэрдо́.

Кэрэ́ла ма́нгэ ладж хохаибэ́н,

Нэ, забисты́р, со мо́л мро камлыпэ́н!

Сонэто 073

Дрэ ма́ндэ одо чён кана́ латхэ́с,

Коли́ на́бут ячнэ́ патря́ лолэ́,

Коли́ нангэ́ рукха́ здран, — шылалэ́с

Одо́й, кай чириклэ́ куч багандлэ́.