2. Благословите Господа, ангели Его, сильнии крепостию, творящии слово Его, услышати глас словес Его.

1. Благословите Господа, вся силы Его, слуги Его, творящии волю Его.

2. Благословите Господа, вся дела Его, на всяком месте владычества Его.

1. Слава Отцу и Сыну и Святому Духу.

2. И ныне и присно и во веки веков. Аминь.

1. Благослови, душе моя, Господа, и вся внутренняя моя, имя святое Его. Благословен еси, Господи.

Ектения малая

Диакон: Паки и паки миром Господу помолимся.

Хор: Господи, помилуй.

Диакон: Заступи, спаси, помилуй и сохрани нас, Боже, Твоею благодатию.

Хор: Господи, помилуй.

Диакон: Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе, и друг друга, и весь живот наш Христу Богу предадим.

Хор: Тебе, Господи.

Иерей: Яко Твоя держава, и Твое есть Царство, и сила, и слава, Отца и Сына и Святаго Духа, ныне и присно и во веки веков.

Хор: Аминь.

Второй антифон

Во время второго антифона зажигается пономарская свеча. Алтарник берёт свечу во время «Единородный Сыне…» и становится с ней на горнем месте.

1. Хвали, душе моя, Господа. Восхвалю Господа в животе моем, пою Богу моему, дондеже есмь.

2. Не надейтеся на князи, на сыны человеческия, в них же несть спасения.

1. Изыдет дух его, и возвратится в землю свою: в той день погибнут вся помышления его.

2. Блажен, емуже Бог Иаковль помощник его, упование его на Господа Бога своего.

1. Сотворшаго небо и землю, море и вся, яже в них.

2. Хранящаго истину в век, творящаго суд обидимым, дающаго пищу алчущим.

1. Господь решит окованныя, Господь умудряет слепцы.