даныны й потверженый продковъ нашихъ: листы никоторыхъ особъ записанные купчые земенные на селища, земли, кгрунты, поля, селы, пущы, дерево бортне, реки, озера, ловы всякые, сеножаты и иные пожытки, к тому монастеру належачие, чого они и теперъ въ спокойномъ держаню суть; которые ижъ ся отъ старосты подралы и обавьяючися оныи, абы и до конца не попсовалыся, што хотечи моцно обвароваты и въ целосты по себЂ на потомные вечные часы церкви Божои заховаты, звлаща ижъ часовъ недавнихъ земля Киевская черезъ насъ ку коруне полской привержена /25/ естъ; для того били намъ чоломъ, абы-смо уси оные листы и права ихъ при моцы зоставилы и, у потверженье наше приведши, тымъ на вечность утвердили и дали имъ на то за печатю коронною нашъ лыстъ ино мы, тых лыстовъ оглядавши, а для широкости пысма ихъ слово отъ слова въ потверженье наше не вкладаючи, велели есмо порадне а вкротце усю речъ, што ся въ ныхъ замыкаетъ, въ семъ нашомъ лысте выписаты, которое то въ собе маютъ: Першій лыстъ короля его мылосты Александра, стрыя нашого, подъ датою мисяця марта двадцять четвертого дня, индыкта второго, пысаный до воеводы Кіевского, князя Дмитрія Путятыча, которымъ его мылость, — за чоломъ-быемъ игумена Іоана светого Мыхайла Золотоверхаго въ Кіеве, ведле суда того воеводы кіевского, маршалка своего, наместныка вытебского, пана Станислава Глебовича, который онъ зъ двореныномъ его мылосты Михайломъ Галыномъ передъ намы мелъ, — островъ церковный на нызъ Днепра и реку Ржавець къ тому манастырю надаты и потвердыты рачылъ, же въ то всьо ныхто уступоваты не маетъ. Другый листъ короля его милости Жигмунта, славнои памьяти отца нашого, справы Коптя писара изъ его милостю за чоломъ-бытыемъ того-жъ пререченого игумена, — к тому монастыру Золотоверхому, ведле лысту и потверженья короля Александра, оный же островъ на нызъ Днепра и рику Ржавець потверждаты рачилъ; писаный под датою місяца іюня четвертого-надцять дня. Третій лыстъ короля Жикгимонта, подъ датою четвертого-надцять дня марца, индыкта десятого: