Мри якх кэрдя́ тыри́ шука́р патри́н,
Да лыл гарадыя́ ило́ миро́;
Мро ма́с кана́ ваш тукэ ра́мка
Э перспекти́ва сы мро грасторо́.
Сыр пиро ва́ст, дыкхэ́с мири́ годы́,
Кай сы кана́ патри́н три чячюны́,
Дрэ ба́ндза
Тырэ́ якхэ́нца о́кна
Джинэ́с, якха́ бут кэ́рна ваш якха́:
Мирэ́ — тыри́ патри́н шука́р, пирда́л
Тырэ́ якха́ миро́ ило́ дыкха́в,
И тут дрэ лэ́стэ, го́жо, почёрья́л.
На́бут джинэ́н якха́ мрэ хоханэ́:
Ту — сыкады, тыро́ ило́ — нанэ́.
Сонэто 025
Конэ́стэ черґэня́ сы бахталэ́,
Паты́в сы лэ́ндэ, куч прокхарибэ́н;
Ман тыкнэды́р черґэнорья́ латхлэ́,
Паладава́ камэ́л ман камлыпэ́н.
Учес газдёл Шэро́ тэл патыва́,
Нэ таґари́тко камлыпэ́н проджя́ла;
Сыр о кхами́тко цвэ́то дрэ ясва́
Хула́с, змэки́ шэро́, ёв пролыджя́ла.
Шэл выкхэлдя́ Вави́р мэрибэна́,
Нэ сыр пал би́бахт екх сы нашадо́,
Тэ угэнэ́ слава́кирэ лына́,
Тэ ёв пхуро́ мэя́ забистэрдо́.
Сом бахтало́, камло́ мрэ камлыпна́са,
Амэ́ екх биваврэ́скро на джива́са.
Сонэто 026
Кэ Ту, мрэ камлыпна́скиро хула́й,
Трэ патыва́са сом мэ припхандло́;
Кэ Ту лыл бичядём, латхэ́са кай
На мри годы́, миро́ ило́ вчиндло́.
Буты́ — бари́, годы мри — чёрори́,
Пхарэ́с тэ дорэса́в лава́ чячес,
Нэ мэ патя́в, со дрэ годы́ тыри́
Ёнэ́ ячена уридэ́ лачес.
Ґалёв, мрэ черґэня́ лыджя́на ман
Кэ бахт лачи́ тэ кэ паты́в бари́;
Соб мэ патывалэ́с, со мо́л ту сан,
Пхэндём: «Кама́м тут!» — пэ́стыр на́ дари́.
Жыка́й дара́в тукэ тэ сыкава́в
Мро камлыпэ́н, шэро́ дур гарава́в.